A Clásica

Práctica Electroclásica / MARCO Vigo

Práctica Electroclásica 

O 16 de novembro estivemos no MARCO, en Vigo, ofrecendo o proxecto Práctica Electroclásica, unha proposta na que se conxugou a música electroacústica e o barroco empregando como nexo a música de Henry Purcell. Para levar a cabo este proxecto contamos cos artistas de EME (Xixón) Miguel Fernández, Honorino García e Jorge Carrillo. Estes tres artistas traballaron sobre a partitura barroca orixinal para xerar unha interpretación propia empregando distintas técnicas e instrumentos contemporáneos. Por outra banda, a sección de vento metal e percusión da Orquesta Clásica de Vigo interpretou as canzonas que compoñen a obra, xerando así un punto de retorno do que partirían cada un dos tres artistas. O resultado foi un diálogo único entre dous tempos e culturas que, por contraposición configuraron o que foi Práctica Electroclásica.

Aquí deixamos unha aproximación á obra que realizaron cada un dos tres artistas:

 

Paraugas, por Honorino García


Paraugas é unha mostra da descontextualización dun obxecto dentro da obra de arte. Obxectos que cun sentido e significado claro, pasan a ser vestidos pola obra de arte e o seu contexto cun significado completamente diferente.

A democratización das novas tecnoloxías e os materiais de última xeración, hoxe máis que nunca nos permiten converter case calquera obxecto en algo totalmente diferente para o que foi deseñado na súa orixe. Paraugas converte unhas sombrillas de fotografía nun instrumento-controlador musical que está formado por 12 sensores pintados cunha pintura que é capaz de conducir electricidade e reaccionar ao tacto. Cando o dispositivo detecta que os sensores tocáronse envían unha mensaxe a un sintetizador que o converte nun son e a un conxunto de luces LED que o fan iluminarse.

Con este instrumento electrónico creado exprofeso para este concerto, Honorino García reinterpretou a obra de Purcell, seguindo a partitura orixinal e traballando coa electrónica como base para xerar unha obra sorprendente e orixinal.

 


Paráfrase sobre In The Midst of Life We Live,
por Jorge Carrillo

A peza consiste nunha paráfrase electroacústica sobre a obra orixinal de Henry Purcell (entendida a idea de paráfrase ao xeito das que fixese Liszt sobre obras de diversos compositores). Deste xeito o texto musical orixinal pode escoitarse no seu integridade, mais con interpolacións do material electroacústico e superposto, a modo de solista, novo material a cargo dun piano de xoguete que, á súa vez, é procesado en vivo.

Para levalo a cabo realizouse unha reinstrumentación por medio de sintetizadores da obra orixinal, remitindo con iso á que fixese no seu día Wendy Carlos, que se combina cos materiais electroacústicos de nova creación.

O piano de xoguete, ao ser procesado en vivo, difumina o material tonal ata crear xunto coa electroacústica unha nube de sons que evoca o concepto de “as néboas da vida” que aparece na sentenza orixinal, para retomar finalmente o material electroacústico das primeiras seccións, pechando a forma xunto cunha reaparición das últimos pasaxes purcellianos. Finalmente, sobre un colchón armónico nos agudos, creado a partir de todo o procesado anterior, entra o piano de xoguete, agora sen procesar, culminando a obra cun último recordo do motivo principal.

 

… y de cómo la polifonía se convierte en monodia… , por Miguel Fernández


Miguel Fernández traballou sobre a partitura empregando o EWI (Electronic Wind Instrument) como instrumento. .Con este instrumento non é posible facer a polifonía orixinal da partitura, polo que o proxecto parte dun traballo de compresión dos elementos sonoros. A obra é un fluxo e refluxo da historia, de como se forma e deforma, se estrutura e se desestrutura a obra como testemuña do tempo. A partir de aquí quixo levar a polifonía á monodia, a modo de camino á inversa. No fondo xace a idea da melodía que van dunha obra a outra.

Tras o, Honorino García e Jorge Carrillo empregaron unhas canicas para xerar unha base sonora reiterativa que emulase o movemento do carro fúnebre da raíña Mary, á que Purcell rende homenaxe coa súa obra.

 

Fotos: Olalla Lojo

Non perdas ningún concerto

Uso de cookies

Esta web utiliza cookies para mejorar su experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies