Presentamos ao pianista Severino Ortiz Rey, que será solista no primeiro concerto da nosa tempada: un monográfico dedicado ao Beethoven romántico co Concerto para piano n.3 e a Sinfonía n.5.

 

ENTRADAS

 

Severino Manuel Ortiz Rey, piano

Nado en Pontevedra, recibe a súa formación pianística máis apreciada e valiosa da profesora Vladimira Smausová. Tras obter os títulos superiores de Piano e Música de Cámara no Conservatorio Superior de Música de Vigo, completa a súa formación na Academia Superior de Música e Artes Escénicas de Praga (República Checa) coas ensinanzas da profesora Dagmar Simonková e do profesor Frantisek Maly (1998–2000). Como solista, colaborou coas orquestras Vigo 430, Clásica de Vigo e Filharmónica de Pontevedra, interpretando os concertos n.º 3, 4 e 5 de Beethoven, o n.º 1 de Chopin, o n.º 1 de Liszt e o concerto para dous pianos de Poulenc.

Desde 2003 forma un dúo estable co seu amigo, o tenor José Antonio Campo Edesa, con quen ten ofrecido recitais en diferentes cidades de España e do estranxeiro. Cómpre destacar a súa participación no XXIII Festival Internacional de Voces de Altafulla (2010), a xira por Bolivia en 2009 organizada pola AECID con motivo do Bicentenario do Grito Libertario, e o recital polo ano Liszt en Ljubljana (Eslovenia), organizado polas embaixadas de España e Hungría (2011). Na súa faceta como músico de cámara, goza colaborando habitualmente co Ensemble Vigo 430 e tocando con solistas como Rusanda Panfili, Lir Vaginsky, Lea Hennino, Cristina Goicea, Virginia Lis e Sindy Mohamed. Non menos importantes son os proxectos realizados co violinista Mario Peris e o clarinetista Roberto Noche, cos que ten difundido música de compositores galegos actuais como Jacobo Gaspar ou Octavio Vázquez, no contexto do programa Erasmus+ (Vilnius, Belgrado, Tirana, 2017–2019).

En 2018 foi convidado pola ADEC para participar como pianista acompañante no VIII Congreso Nacional de Clarinete, celebrado en Torrent (Comunidade Valenciana). Recentemente, ofreceu o recital inaugural do IX Congreso ADEC xunto a Philippe Berrod e Sharon Kam (Vigo, 2022).